RICKY AND ROSEMARIE

NOSTALGIA 5:
RIKITIK LOVES ROSITIK

By Ely Sablan

Source: Jingle Extra Hot Movie Entertainment Magazine
No. 108, February 24, 1983

Taong 1966 noon sa Sampaguita Studio, isa si Rosemarie Sonora sa sikat na sikat na Stars ’66 noon. Partner-partner ang mga artistang kasama sa grupong iyon na binuo nang yumaong Doctor Jose Vera Perez. Kabilang din sa grupong yon sina Dindo Fernando, Bert Leroy, Jr., Edgar Salcedo, Shirley Moreno, Blanca Gomez, Gina Pareño, Loretta Marquez, Pepito Rodriguez at Ramil Rodriguez.

Ang ka-loveteam noon ni Rosemarie ay si Pepito Rodriguez. Ilan sa mga pelikula nilang pinagtambalan, kasama ang iba pa sa Stars ’66, ay ang Mga Batang Milyonaryo, Bus Stop, All Over The World, Mga Batang Bakasyunista, Mga Batang Turista, Sandwich Shindig, Mga Batang Iskwater, Mga Batang Lagim at marami pang iba na halos lahat ay dinumog sa takilya.

Isa sa mga sikat na loveteam ang kina Rosemarie at Pepito, na pinatunayan ng mga pelikulang tulad ang Juanita Banana at Magic Bilao. Naging napakaganda ng kanilang pagtitinginan at talagang sila n asana ang magkakatuluyan nang biglang pumasok sa kanilang pag-iibigan si Ricky Belmonte, after his first movie na Si Siyanang at ang Pitong Tsikiting. Nabulabog ang loveteam nina Rose at Pepito at naging love triangle ito nang pumasok nga sa eksena si Ricky. Dahil sa kanilang reel and real life love triangle, naisipang gumawa ng pelikula ni Doc Perez na tampok ang tatlo. Syempre pa, tumabo sa takilya ang kanilang pelikula.

Maraming naging kalaban si Rosemarie sa Sampaguita na nagkaroon din ng pangalan sa pelikula. Nung panahong yun, naging mahigpit niyang katunggali si Helen Gamboa. Sikat na singer noon si Helen kaya medyo kinabahan rin ang Vera Perez. Gayunpaman, nanatili pa rin si Rose sa kanyang trono.

Samantala, si Ricky ay nakapareha rin sina Jeanne Young, Susan Roces, Amalia Fuentes at iba pa.

At dumating nga ang puntong kailangang mamili si Rosemarie kina Ricky at Pepito. At pinili nga niya si Ricky Belmonte upang kaniyang maging sweetheart at asawa. Naging sikat ang katagang Rikitik loves Rositik. Nagsama ang dalawa sa mga pelikulang Young at Heart, Sayonara My Darling, Valentine’s Wedding, Ye-Ye Generation, Nine Teeners at iba pa. Isa sila sa mga pinakamalakas na loveteam noon (at magpahanggang ngayon naman, di ba?).

Ayon nga kina Ricky at Rose, na itinuturing nang halos karamihan na may matagumpay na samahan sa mga mag-asawang artista, ay habang panahon na lang na silang magsasama sa pelikula. Hindi rind aw nila akalain na sila rin ang magkakatuluyan. Subalit hindi naman sila nagsisisi dahil maganda naman ang samahan nilang mag-asawa ngayon.

Sa ngayon, biniyayaan sila ng Diyos ng tatlong anak sa katauhan nina Wowie, Sheryl at Patrick. Sa tatlong ito, si Sheryl ang unang naakit ng pelikula. Sa katunayan, nag-produce sila ng pelikula, ang Candy na tinampukan ni Sheryl sa lead role at kasama ang maraming guest stars. Humakot sa takilya ang pelikula kaya lang, hindi muna ito sinundan ng mag-asawa dahil ayaw nilang maistorbo ang pag-aaral ng bata.

Ang samahan ng mag-asawang Ricky at Rose, katulad din ng iba, ay iniintriga. Naririyang intrigahin sila ana maghihiwalay na sila. Pero kahit ano pa yata ang mangyari, talagang hindi kayang paghiwalayin ng landas ang mag-asawa ng kung sinu-sinong intrigero.

Ayon nga kay Ricky, hindi naman niya pinagbabawalang lumabas sa pelikula si Rose. Siyempre, gusto lang niya yong pelikulang talagang babagay ditto.

At bilang handog nga sa mga tagahanga ng Ricky at Rose sa taong ito, mapapanood ulit silang dalawa kasama ang dalawa nilang anak, sina Wowie at Sheryl, sa pelikulang Home Sweet Home ng Baby Pascual Films & Associates. Kasama rin nila rito ang mabait at mahusay umarteng si Janice de Belen, pati na ang batang si Peewee Quijano.

Sa pelikulang nabanggit, isang pamilyang mahirap ang ginampanan nila. Mahirap ngunit masayang nagsasama. Dahilan na rin sa hirap ng buhay at upang maitaguyod ang kinabukasan ng pamilya, nagpasiya si Ricky na pumunta sa Saudi upang doon magtrabaho. Dito nagsimula ang kalungkutan ng kanilang pamilya.

Kasama rin sa Home Sweet Home si Charito Solis sa papel na tiyahin ng mga bata na mahigpit at malupit sa mga bata.

Parang tunay na pamilya talaga ang makikita mo sa shooting ng Home Sweet. Tulung-tulong silang lahat sa ikagaganda ng pelikula. At talagang masayang pamilya ang kanilang inilarawan sa kabuuan nito.

Ang pamilya nina Ricky at Rose ay maituturing nating isang modelong pamilya. Nababakas pa rin sa kanila ang kahalagahan ng pagmamahalan sa isa’t isa at ang pagtataguyod sa kinabukasan ng kanilang mga anak. Kung walang pelikula si Rose, abala siya sa pag-aasikaso ng kanilang munting negosyo samantalang si Ricky naman ay kumakanta sa nightclub kasama ang kanyang itinayong grupo.

Kaya, kahit na anupang mg intriga at unos ang dumating sa kanilang buhay, hindi nila mapaghihiwalay ang samahan ng mag-asawang Ricky at Rose dahil Rikitik loves Rositik! At very much, di ba?

* * * * * *

Thanks to Simon Santos of video48.blogspot.com for the movie ads.

* * * * * *

RONNIE AND SUSAN

NOSTALGIA 4:
FERNANDO POE, JR. AT SUSAN ROCES
“ANG DAIGDIG KO’Y IKAW”

By Ely S. Sablan

Source: Jingle Extra Hot Movie Entertainment Magazine, 1983

Hindi na ipinagtatanong pa kung ano ang katayuan ngayon nina Fernando Poe, Jr. at Susan Roces. Ang dalawang bituing ito ang itinuturing pa rin sa kasalukuyan na Hari at Reyna ng pelikulang Tagalog. Bagama’t hindi na sila masyadong gumagawa ng mga pelikulang sila ang magkapareha, naroon pa rin ang paghanga at pagtangkilik sa kanila ng masa, magkapareha man sila sa pelikula o hindi.

Marami ang nagtatanong noong bago pa lang sumisikat sina Ronnie at Susan kung bakit at paano nagkagustuhan ang dalawa samantalang magkahiwalay naman sila ng kompanyang pinaglilingkuran. Si Susan ay contract star ng Sampaguita Pictures at si Ronnie naman, kung hindi ako nagkakamali, ay sa bakuran ng Larry Santiago Productions nagsimula.

Sabagay, hindi na dapat pang pagktakhan ang mga bagay na iyan. Siyempre, artista, marahil sa isang sosyalan sa showbiz sila nagkakilala at nag-meet nang personal. O baka naman ang kanilang mga puso ay nakatakda na sa isa’t isa dahil hindi ba napakaraming naging leading men si Susan na nagkagusto rin sa kanya at si Ronnie naman ay iba’t iba rin ang nakaparehang babae sa pelikula? Talaga lang sigurong nakaukit na sa tadhana ang kanilang kapalaran.

Ngayon natin bubuksan ang maliligayang araw ni Susan sa bakuran ng Sampaguita Pictures. Noong nandito pa siya, alam ng lahat na mahigpit ang labanan o rivalry nila ni Amalia Fuentes. Sa tuwing magkakaroon ng mga patimpalak ang bawat magazines, silang dalawa ni Amalia ang mahigpit na naglalaban sa unang puwesto.

Subalit, ayon sa ilang interbyu natin sa batikang manunulat na si Tom Adrales, si Susan daw ang palaging nangunguna sa mga patimpalak at si Amalia ay pangalawa lang. Pero hindi namin gusting sabihin na natutulog ang mga tagahanga ni Amalia. Mas masuwerte nga lang si Susan sa mga naturang pa-contest.

Noong kainitan pa ni Susan, hindi ko malilimutan ang mga pelikulang pinagtambalan nila ni Fernando Poe, Jr. sa iba’t ibang produksyon tulad ng Ang Daigdig Ko’y Ikaw, Magpakailanman at Zamboanga.

Samantala, si Ronnie Poe naman ay sikat na sikat din. Maraming pelikula ang napanood ko na iba’t iba ang kanyang leading lady. Nariyan si Amalia Fuentes na kasama niya sa pelikulang Rosaryo at Baril, Dugo sa Buhangin with Helen Gamboa, My Little Christmas Tree with Nora Aunor at Bato sa Buhangin with Vilma Santos. Lahat nang ito ay tinangkilik ng mga tao.

Hindi lang iyan. Maraming pelikula pa rin si Ronnie na pawang hit at ang ilan ditto, na akin pang natatandaan, ay ang Daniel Barrion, Baril na Ginto, Alupihang Dagat, Perlas ng Silangan, Duelo sa Sapang Bato, Manu-Mano, Magiting at Pusakal, Santiago at iba pa.

Si Susan naman, pagkaraan ng kanyang Sampaguita days, ay pumareha naman kay Romeo Vasquez na pinagkakaguluhan din noon. Maruja ang pinagtambalan nilang pelikula, under Lea Productions, na talaga naming tumipak nang husto sa takilya. Tangkilikin ba naman ito ng fans nilang dalawa. At maganda ang istorya ng nasabing pelikula.

Pagkatapos ng matagumpay na pelikula nila ni Bobby, nasundan ito ng Bandana at ang Romansa sa World’s Fair na kinunan sa ibang bansa. Kumitang muli sa takilya ang mga pelikulang ito.

Kahit hindi sila gaanong tumambal sa isa’t isa nung kapanahunan nila, naging malapit naman ang kanilang mga puso.

Ikinasal ang dalawa sa Sanctuario de San Jose sa Greenhills. Naging Ninong at Ninang nila ang Pangulo at Unang Ginang ng bansa. Naging abay sa kanilang kasal ang tatlong kapatid ni Susan na sina Rosemarie, Teresita at Bennet Sonora. Ang mga kapatid na lalaki ni Ronnie ay naging abay rin.

Napakarangya ng kasal nina Ronnie at Susan. Tinagurian itong pinakamagandang wedding nung taong iyon sa showbiz. Napakaraming kilalang tao ang dumalo at nung araw ng kanilang kasal, ang Roper’s Studio ang siyang kumuha ng larawan ng dalawa na na-publish sa lahat na yata ng magazines at diario nung panahong iyon. Ang Daigdig Ko’y Ikaw ang inawit sa kanilang kasal.

Bagama’t hindi pinalad na magkaroon ng anak sina Ronnie at Susan, hindi pa rin nabawasan ang kanilang pagmamahalan. Ang pag-ibig na kanilang sinumpaan sa harap ng altar ay naroroon pa rin sa kanilang puso. Na magsasama nang walang hanggan, sa hirap man o sa ginhawa. Gayunpaman, masaya pa rin ang kanilang tahanan dahil mayroon silang isang anghel sa katauhan ng magandang si Mary Grace. Hindi maikakaila na si Fernando Poe, Jr. ay modelo ng isang tunay na aktor. Halos lahat ng bata, matanda, teen-ager ay iniidolo siya. Ganyan kalakas ang power niya sa masa.

Si Susan naman ay larawan ng isang magandang Pilipina. Napakayumi at busilak ang puso. Talagang napakapalad ng dalawang ito at kinaiinggitan ng balana ang kanilang pag-iibigan. Subok na matibay at subok na matatag pa. Kay asana, maging halimbawa sila ng mga artistang nagkakatuluyandin sa buhay upang sa ganoon, kahit anong hirap ang kanilang maranasan ay naroon pa rin sila, maligaya at tahimik na nagsasama, tulad nina Ronnie at Susan.

Sana ay gumawa ngayong taong ito ng isang pelikulang may magandang istorya sina Ronnie at Susan. Yung pelikulang tatatak talaga sa isipan ng masa.

* * * * * *

















Thanks to Simon Santos of video48.blogspot.com for the movie ads.

* * * * * *

VILMA SANTOS: NOON AT NGAYON

Modern Romances & True Confessions

December 15, 1980

Click images to enlarge.

* * * * * *

ROMEO AND AMALIA

NOSTALGIA 3:
BALIKAN NATIN ANG NAKARAAN SA BUHAY
NINA AMALIA AT ROMEO

By Ely S. Sablan

Source: Jingle Extra Hot Movie Entertainment Magazine, 1983

Ang pag-ibig, kapag pumasok sa puso ninuman, hahamakin ang lahat masunod ka lamang.

Ito sa tuwina ang mga katagang palaging sinasambit ng mga taong nagmamahalan. Mga nilalang na napana ni Kupido ang mga puso na kapag iyong hinadlangan ang kanilang pag-iibigan ay pilit na maghuhumiyaw – sa ngalan ng pag-ibig. Ito ang mga naganap sa bubuksan kong nakaraan sa buhay nina Amalia Fuentes at Romeo Vasquez.

Noong kapanahunan nina Bobby at Nena sa Sampaguita, marami sa kasamahan nila rito ang kinaiinggitan ang kanilang pag-iibigan at pagtatambal sa pelikula. Kakaiba raw kasi ang pagtitinginang namagitan sa dalawa. Hindi raw tulad nang ibang artista sa naturang kompanya na palaging may awayan at tampuhan na kung minsan ay nadadamay tuloy ang kanilang mga schedule sa shooting. Dahil nga sa galit-bati, ang iba ay hindi pumupunta sa set at ang iba naman ay naroon nga, subalit wala naming kibuan.

Ang namagitan na pagmamahalan kina Bobby at Nena ay daig ang dalawang lovebirds sa kanilang tamis ng pag-iibigan. Very romantic sila at talagang may tatak sa publiko ang kanilang relasyon.

Sinasabi nilang si Romeo Vasquez ay isa sa maituturing na may pinakaguwapong mukha noong kaniyang kabataan. At si Amalia Fuentes naman ang may pinakamagandang mukha sa hanay ng kababaihan.

Ikaw ay Akin ang unang pinagtambalang pelikula nina Amalia at Romeo sa labas ng Sampaguita at ayon sa aming balita, dito dinimanda ni Doctor Jose Perez si Amalia dahil sa paglabag ng huli sa nilagdaan niyang kontrata. At ang production na nag-produce nito ay ang RA Movie Fans Productions na sila Amalia at Romeo rin ang nag-produce.

Bagama’t sinasabi ng mga taga-labas ng naturang production na ang Sampaguita ang isa sa mga kompanyang kapag nagkamali ang kanilang artista kahit minsan lang ay gumagawa kaagad ng hakbang laban dito, ito naman ay nakahandang makipag-areglo dahil naniniwala ito na ang lahat ng gusot at hindi pagkakaintindihan ay napag-uusapan naman.

Naging matagumpay ang pagiging magkapareha nina Bobby at Nena simula nang mag-hit ang unang pelikulang pinagtambalan nila. Nasundan kaagad ito ng napakaraming pelikula sa labas ng Sampaguita tulad halimbawa ng Anna Lizza, Kulay Dugo ang Gabi, Ibulong Mo sa Hangin, Anino ni Sisa, Sa Ating Muling Pagkikita, Wedding Bells at marami pang iba na halos lahat ay nag-hit.

Marami ang nagsasabi na may pagka-suplada si Amalia noong kabataan nito sa Sampaguita. Subalit ayon na rin sa mga sinabi ni Nena, inilalagay naman niya sa lugar ang kanyang pagsusuplada.

Bagama’t sina Amalia at Juancho Gutierrez ang tinaguriang Mr. and Miss Number One noong kanilang kasikatan, hindi rin naman nagpatalo sa pagiging popular ang kaguwapuhan ni Bobby Vasquez. Isa siya sa pinagkakaguluhan ng maraming teenagers noon.

Ganoon din si Amalia. Napakaganda niya at talagang pinuputakti siya ng balana. Itsura nina Snooky, Sharon Cuneta at Maricel kung siya ay pagkaguluhan noon.

Ang artistang naging mahigpit na kalaban ni Amalia ay si Susan Roces. Kapag may pelikulang ginagawa si Amalia noon, mayroon ding katapat na pelikulang ginagawa si Susan. Kapag may showing na pelikula si Amalia, tinatapatan din ni Doc Perez ito ng pelikula ni Swanie. Ganoon kahigpit ang labanan ng dalawa noong araw – sabi ng aking napaka-authoritative na resource person na walang iba kundi si Mama Monchang.

Nagkaroon din ng pelikulang magkasama sina Susan at Amalia sa bakuran ng Sampaguita. Ito ay ang Tulisan na kumita ng husto sa takilya. Ito ang pelikulang pinag-usapan talaga sa showbiz noong mga panahong iyon.

Sa isang iglap ay nabago ang mga pangyayari. Bigla na lamang sumabog ang balitang nagtanan – nagpakasal sina Bobby at Nena sa Hongkong. Parang bomba itong pumutok sa larangan ng showbiz at halos lahat na yata ng magazines at diario ay na-headline ang pag-aasawa ng isa sa pinakatanyag na loveteams noon sa pelikulang Tagalog. Dahil doon, nagkaroon tuloy sila ng isang pelikula na ang titulo ay Honeymoon.

Maraming artista ang nagkapangalan at naging superstar sa Sampaguita noon. Ilan sa mga naging kalaban ni Amalia sa hanay ng kababaihan ay sina Susan Roces, Daisy Romualdez, Nori Dalisay, Jean Lopez, tessie Agana at iba pa.

Sa hanay naman ng kalalakihan ay naging mahigpit na katunggali ni Romeo Vasquez noon sina Jose Mari, Eddie Gutierrez, Tito Galla, Tony Marzan, Vic Vargas.

Isa pa sa umuusok na balita sa showbiz noon ay ang pagsisilang ni Amalia ng kanilang anak ni Bobby na si Anna Lizza na ngayon ay isa nang ganap na teenager na ubod ng ganda at talino. Matapos ang mahabang panahon ng pagsasama nina Nena at Bobby, nagkahiwalay na sila ng landas at nagkanya-kanya na sila ng pamumuhay.

Si Amalia ay nag-produce na lang ng maraming pelikula at si Bobby naman ay tumulak sa USA para doon na muna mamuhay ng tahimik.

Pagkatapos maghiwalay sina Amalia at Romeo, maraming nangyaring intriga. Isa nga rito yung may love si Bobby sa abroad kaya hindi na niya naalala ang dalawang mahal niya sa buhay. Subalit ang katotohanan noon ay wala naman talaga. Dib a pagkatapos ng ilang panahon ay nagkita rin sila Romeo, Amaliaat Liezl?

Sana, sa darating na mga araw ay muling magtambal sa pelikula sina Romeo at Amalia at tuloy makasama nila ang kanilang nag-iisang anak na si Anna Lizza. Kayo, hindi ba umaasa rin?

* * * * * *









Thanks to Simon Santos of video48.blogspot.com for the movie ads.

* * * * * *